Ebanghelyo: LUCAS 15,1-3, 11-32
Lumapit kay Jesus ang lahat ng kolektor ng buwis at mga makasalanan para makinig. Kaya nagbulung-bulungan ang mga Pariseo at mga guro ng Batas, “Tinatanggap n’ya ang mga makasalanan at nakikisalo sa kanila.” Kaya sinabi ni Jesus ang talinhagang ito sa kanila: “May isang taong may dalawang anak na lalaki. Sinabi ng bunso sa kanyang ama: ‘Itay, ibigay n’yo na sa akin ang parte ko sa mana.’ At hinati sa kanila ng ama ang mga ari-arian. Pagkaraan ng ilang araw, tinipon ng bunsong anak ang lahat ng kanya at naglakbay sa malayong lupain. Doon n’ya winaldas ang sa kanya sa maluwag na pamumuhay. Nang maubos na ang lahat sa kanya nagkaroon ng matinding taggutom sa lupaing ‘yon at nagsimula siyang maghikahos. Kaya’t pumunta s’ya at namasukan sa isang taga-roon at inutusan s’yang mag-alaga ng mga baboy sa bukid nito. At gusto sana n’yang punuin kahit na ng kaning baboy ang kanyang tiyan pero wala namang magbigay sa kanya. Noon s’ya natauhan at nag-isip: ‘Gaano karaming arawan sa bahay ng aking ama na labis-labis ang pagkain at namamatay naman ako dito sa gutom. Titindig ako, pupunta sa aking ama at sasabihin ko sa kanya: ‘Itay nagkasala ako laban sa Langit at sa harap mo. Hindi na ako karapat-dapat pang tawaging anak mo, ituring mo na akong isa sa iyong mga arawan.’ Kaya tumindig siya papunta sa kanyang ama. Malayo pa s’ya ng matanaw ng kanyang ama at naawa ito. Patakbo nitong sinalubong ang anak, niyakap at hinalikan. Sinabi sa kanya ng anak, ‘Ama, nagkasala ako laban sa langit at sa harap mo, hindi na ako karapat-dapat pang tawaging anak mo.’ Pero sinabi ng ama sa kanyang mga utusan: ‘Madali, dalhin n’yo ang dati niyang damit at ibihis sa kanya. Suotan nyo ng singsing ang kanyang daliri at ng sapatos ang kanyang mga paa. Dalhin at katayin ang pinatabang guya. Kumain tayo at magsaya sapagkat namatay na ang anak kong ito at nabuhay, nawala at natagpuan.’ At nagsimula silang magdiwang. Nasa bukid noon ang panganay na anak. Nang pauwi na s’ya at malapit na sa bahay, narinig n’ya ang tugtugan at sayawan. Tinawag n’ya ang isa sa mga utusan at tinanong sa kanya. ‘Nagbalik ang kapatid mo kaya ipinapatay ng iyong ama ang pinatabang guya dahil nabawi n’ya s’yang buhay at di naano.’ Nagalit ang panganay at ayaw pumasok kaya lumabas ang ama at nakiusap sa kanya. Datapuwat sumagot sa kanyang ama, ‘Ilang taon na akong naglilingkod sa ‘yo na di lumalabang sa iyong mga utos at kailan man ay hindi mo ako binigyan ng kahit na isang maliit na kambing na ipagkakatuwa namin ng aking mga kaibigan. Datapuwa’t ng dumating ang anak mong ito na naglustay ng iyong kayamanan sa masasamang babae, pinatay mo ang pinatabang baka.’ Ngunit sinabi sa kanya ng ama, ‘Anak, lagi kitang kasama at sa iyo rin ang lahat ng akin. Pero dapat lamang na magdiwang at magsaya tayo dahil namatay na ang kapatid mo at nabuhay, nawala at natagpuan.’”
Pagninilay:
Magiliw kaming pinatuloy ng isang retired successful businessman sa kanyang tahanan. Naikwento niya na maraming beses silang naghiwalay ng kanyang namayapang misis dahil sa kanyang mga bisyo lalung-lalo na ang pambababae. Ngunit tuwing uuwi siya sa kanilang tahanan, wala siyang tinatanggap na sumbat sa kanyang asawa. Minsan pa raw, napagbuhatan niya ng kamay si misis ngunit hindi raw nagsawang magpatawad at magmahal ang kanyang maybahay na may ginintuang pusong. Ni minsan ay hindi raw niya naramdamang kinamuhian siya ng kanyang mga anak sapagkat pinalaki sila ng kanilang nanay na mapagpakumbaba, magalang at mapagpatawad.
Kapanalig, nakaka-inspire ang ating Mabuting Balita ngayon pati na rin ang kwento ng retiradong businessman. Ngayong Panahon ng Kwaresma, suriin natin ang ating budhi at tingnan natin: may nagawa ba tayong masama sa ating kapwa at kailangan nating humingi ng tawad nang may pagpapakumbaba? Tingnan din natin kung meron pa ba tayong kailangang patawarin? Huwag nating ipagkait sa ating sarili ang kalayaan at kapayapaang handog ng Panginoon sa mga mapagpakumbabang humihingi ng tawad at nagpapatawad.
Sabik ang Panginoon sa ating pagbabalik-loob sa Kanya. Lakas-loob tayong mangumpisal at tanggapin nang may kagalakan ang walang pasubaling awa, pag-ibig at walang hanggang pagpapatawad ng Diyos.