Mabuting Balita l Oktubre 29, 2025 – Miyerkules, Ika-30 na Linggo sa Karaniwang Panahon (I)

Ebanghelyo: Lucas 13, 22-30

Dumaan si Hesus sa mga lunsod at mga nayon na nagangaral habang papunta s’ya sa Jerusalem. May nagtanong sa kanya, “Panginoon, kakaunti nga ba ang maliligtas?” At sinabi ni Hesus sa mga tao, “Magpumilit kayong pumasok sa makipot na pintuan sapagkat sinasabi ko sa inyo marami ang gustong pumasok at di makapapasok. Kapag tumindig na ang may-ari ng bahay at naisara na ang pinto, tatayo kayo sa labas na kumakatok at magsasabing, ‘Panginoon, buksan mo kami.’ Sasagot naman s’ya sa inyo, ‘Hindi ko alam kung taga-saan kayo.’ Kaya sasabihin ninyo, ‘Kami ang kumain at uminom na kasalo mo, at sa aming mga lansangan ka nangaral.’ Ngunit sasagutin n’ya kayo, ‘hindi ko alam kung taga-saan kayo. Lumayo kayo sa akin kayong gumagawa ng masama.’ Naroon ang iyakan at pagngangalit ng mga ngipin pagkakita ninyo kina Abraham, Isaac, Jacob at sa lahat ng Profeta sa kaharian ng Diyos at ipagtatabuyan naman kayo sa labas. At makikisalo naman sa kaharian ng Diyos ang mga darating mula sa silangan, kanluran, timog at hilaga. Oo, may mga huli ngayon na mauuna at may mga una na mahuhuli.

Pagninilay:

Gaano ka kakilala ng ating Hesus Maestro? Feeling mo ba close ka sa Kanya tulad sa Mabuting Balita? May mga kumatok sa pintuan ng langit. May dalang resume ng tagumpay. May listahan ng ministry, ng outreach, ng dami ng pagluhod sa pagdarasal. Pero ang sagot ni Hesus: “Hindi ko kayo kilala.” Ang sakit noon, ah? Paano’ng hindi ka Niya kilala, eh nilikha ka Niyang kawangis at kalarawan? Ang sagot? Dahil ang pagkakilala ay higit pa sa biodata. Kundi kung gaano mo hinayaang makapasok sa buhay mo ang ating Hesus Maestro. Kilala ka ba Niya sa galit mong itinatago? Sa sugat na pilit mong tinatakpan ng “okay lang ako”? Kilala ka ba Niya sa mga gabi ng katahimikan na buntong-hininga lang ang alam mong dasal? Kasi kung totoo ang relasyon, walang verification. Walang “prove you’re not a robot.” Walang “send code to your email.” ‘Pag lumapit ka, hindi Siya naghahanap ng ID. Alam Niya ang tibok ng puso mo. Hindi ang dami ng recognition plaque o resume ng tagumpay ang hanap ng ating Hesus Maestro. Kundi kung gaano mo Siya kamahal at kung gaano mo hinayaang mahalin ka Niya. 

• Sr. Gemmaria Dela Cruz, fsp l Society of St. Paul