Ebanghelyo: Lucas 16,19-31
Sinabi ni Hesus sa mga Pariseo: “May isang mayaman na nakabihis ng magarang damit at pinong linen at parang piesta ang kanyang buhay araw-araw. Nakahandusay naman sa may pintuan n’ya ang isang dukhang nagngangalang Lazaro. Tadtad s’ya ng sugat at gusto sana n’yang kanin ang mumong nahuhulog sa hapag ng mayaman; sa halip ay mga aso ang lumalapit sa kanya at hinihimuran ang kanyang sugat. At namatay ang dukha at dinala s’ya ng mga anghel sa piling ni Abraham. Namatay din ang mayaman at inilibing. Nang nasa impiyerno na s’ya tumingala s’ya sa kanyang pagdurusa at natanaw sa malayo si Abraham at si Lazaro sa piling nito. Kaya’t sumigaw siya: ‘Amang Abraham, maawa ka sa akin at utusan mo naman si Lazaro na isawsaw n’ya sa tubig ang dulo ng kanyang daliri at paginhawahin ang aking dila dahil lubha akong naghihirap sa lagablab na ito.’ ‘Anak, alalahanin mong tinanggap mo na sa buhay mo ang mabuti sa iyo at kay Lazaro naman ang masasama. Kaya s’ya ngayon ang nasa ginhawa at ikaw ang nagdurusa. At isa pa’y malawak na bangin ang hindi matatawid ang itinakda sa pagitan natin. Kaya hindi makatatawid ang mga may gustong pumunta riyan galing dito at hindi rin naman makatatawid ang mula riyan papunta rito.’ ‘Kaya ipinakikiusap ko sa iyo, Ama, na papuntahin mo si Lazaro sa bahay ng aking ama, kung saan naroon ang lima kong kapatid para babalaan sila upang di sila mapunta sa lugar na ito ng pagdurusa.’ ‘Nasa kanila si Moises at ang Mga Propeta, makinig sila sa mga ito.’ ‘Hindi gayon, Amang Abraham; kung isa sa mga patay ang pupunta sa kanila, magsisisi sila.’ ‘Kung hindi nila pakikinggan si Moises at ang Mga Propeta, hindi pa rin sila maniniwala bumangon man ang isa sa mga patay.’”
Pagninilay:
Panalangin. Paglilimos. Pagsisisi. Ang tatlong gawaing ito ay palaging gabay sa panahon ng Kuwaresma. Pinapaalala ng Mabuting Balita ngayon na binibigyan tayo lagi ng Diyos ng pagkakataon na magpakita ng pagmamahal at pangangalaga sa mga dukha. Maaaring hindi lamang ng kanilang pangangailangan pisikal kundi pati na rin ang ating buhay-espirituwal.
Naibibigay ko ba ang buo kong sarili sa mga nangangailangan sa sandaling ito? Sino ang aking kapitbahay, ang kaibigan, o pamilya na nangangailangan ng aking tulong? Ang panahon ng Kuwaresma ay higit pa sa paglilimos. Isa itong sagradong paglalakbay kasama ang Diyos na may pag-asa at nagtatanong: naglalaan ba ako ng mas maraming panahon na makinig at magnilay-nilay sa salita ng Diyos? Panahon rin ito para kilalanin ang ating mga pagkukulang at kasalanan, at magsisi. Hindi lamang ito panahon para sa pagbabahagi ng materyal na bagay kundi ang magbahagi ng pagmamahal at habag ng Diyos sa isa’t isa. Panahon rin ito upang pagnilayan ang kamatayan at ang buhay na walang hanggan, dahil ang katapusan ng buhay ay ang makasama ang Ama sa langit.
Manalangin tayo: Panginoon, bigyan mo ako ng biyayang tanggapin at magpasalamat sa lahat ng kabutihang ipinakita mo sa aking buhay. Nawa’y magbunga ang aking paglalakbay sa Kwaresma hindi lamang para sa akin kundi para sa lahat.