EBANGHELYO: LUCAS 20:27-40
Lumapit noon ang ilang Sadduseo na mga taong tutol sa pagkabuhay. At itinanong nila kay Jesus: “Guro, isinulat ni Moises para sa amin: ‘Kung may magkakapatid na lalaki at mamatay na walang anak ang isa sa kanila, kailangang kunin ng kanyang kapatid ang kanyang asawa para magpasibol ng supling sa kanyang kapatid.’ Ngayon, may pitong magkakapatid na lalaki. Nag-asawa ang panganay at namatay na walang anak. Kinuha ng pangalawa ang biyuda, at pagkatapos ay ng pangatlo naman, pero hindi nagkaanak ang pito. Namatay sila at sa bandang huli’y namatay rin ang babae. Sa pagkabuhay, kanino sa pito siya maituturing na asawa? Ang pito nga ang umangkin sa kanya.” Sinagot sila ni Jesus: “Nag-aasawa ang mga taong nasa daigdig na ito, lalaki man o babae. Ngunit hindi na mag-aasawa ang mga ituturing na karapat-dapat sa kabilang-buhay at sa pagkabuhay ng mga patay, lalaki man o babae. Hindi na nga sila mamatay. Kapantay na sila ng mga anghel at mga anak sila ng Diyos matapos silang ibangon. Tiyak na may pagkabuhay ng mga patay; ipinahiwatig ito kahit na ni Moises sa kabanata ng palumpong nang tawagin niyang Diyos ni Abraham, Diyos ni Isaac at Diyos ni Jacob ang Panginoon. Hindi siya Diyos ng mga patay kundi ng mga buhay, at buhay na kasama niya silang lahat.” Nagsalita ang ilang guro ng Batas: “Guro, talaga ngang tama ang iyong sinabi.” Mula noo’y wala nang nangahas na magtanong pa sa kanya.
PAGNINILAY:
Kamusta sa mga kababayan nating Overseas Filipino Workers o OFW? Saludo kami sa inyong mga sakripisyo at pagsusumikap upang makapagbigay ng maginhawang buhay sa inyong pamilya. O di kaya, kayo ang pamilyang naiwan dito sa Pilipinas? Alin man kayo sa mga ito, nandiriyan ang kalungkutan na mawalay sa inyong mga mahal sa buhay. Minsan rin akong naging OFW kaya’t batid ko ang inyong dinaranas. Pero, pinapaalalahanan tayo ng ebanghelyo ngayon sa isang katiyakan, na sa ating muling pagkabuhay, magiging kapantay na tayo ng mga anghel. Hindi na tayo mawawalay sa ating pamilya kailanman, sa ating tunay na pamilya sa langit kasama ang Diyos na ating Ama… sa Isang buhay na kasiya-siya at walang hanggan. Amen. – Anne Loraine Santos