Daughters of Saint Paul

NOBYEMBRE 15, 2022 | MARTES SA IKA-33 LINGGO NG TAON

Buo kaya ang ating loob na lumalapit  kay Jesus para hingin ang kanyang biyaya at awa?   Mapagpalang araw mga kapanalig!  Pasalamatan natin ang Panginoon/ sa mga dakila Niyang gawa at pagpapala sa atin.   Ito po muli ang inyong lingkod, Sr. Amelyne Paglinawan / ng Daughters of St. Paul!   Ihanda na natin ang ating puso at diwa sa pagtanggap sa Panginoon sa Mabuting Balita ngayon.

EBANGHELYO: Lk 19:11-28

Malapit na sa Jerusalem at akala ng mga taong kasama niya’y agad na ipakikita ang Kaharian ng Diyos.  Kaya sa kanilang pakikinig ay isa pang talinhaga ang inilahad sa kanila ni Hesus.  Sinabi niya: “May isang maharlikang tao na pumunta sa malayong lupain para mahirang na hari at saka siya babalik.  Tinawag niya ang sampu niyang katulong at binigyan sila ng tig-iisang baryang ginto at sinabi sa kanila:  ‘Ipagnegosyo ninyo ito hanggang sa aking pagbalik.’ Namumuhi sa kanya ang kanyang mga kababayan kaya nagsugo sila ng ilang kinatawan para sabihin:  ‘Ayaw naming maghari sa amin ang taong ito.’ Gayon pa ma’y bumalik siya pagkahirang bilang hari.  Ipinatawag niya ang mga katulong na binigyan niya ng baryang ginto para malaman kung magkano ang tinubo ng bawat isa.  Humarap ang una at sinabi:  ‘Panginooon, tumubo pa ng sampu ang barya mong ginto.’ Sumagot siya:  ‘Magaling, mabuting utusan; dahil naging matapat ka sa maliit na bagay, mapamamahala kita sa sampung lunsod.’  Dumating ang ika-lawa at sinabi:  ‘Panginoon, tumubo ng lima pa ang iyong baryang ginto.’  Sinabi nito sa kanya:  ‘Mamamahala ka sa limang lunsod.’ Dumating ang isa pa at sinabi:  ‘Panginoon, narito ang iyong baryang ginto.  Binalot ko ito sa isang panyo at itinago.  Natatakot ako sa iyo dahil mapaghanap kang tao, kinukuha mo ang di mo idineposito at inaani ang di mo inihasik.’ Sinabi sa kanya ng panginoon:  ‘Masamang utusan, sa sarili mong mga salita kita hahatulan.  Alam mo palang mapaghanap ako, na kinukuha ko ang hindi ko idineposito at inaani ang hindi ko inihasik, bakit hindi mo idineposito sa bangko ang aking baryang ginto?  At makukubra ko sana iyon pati na ang interes pagbabalik ko.’  At sinabi niya sa naroon:  ‘Kunin sa kanya ang baryang ginto at ibigay sa may sampu.’  Sumagot sila:  ‘E, Panginoon, may sampung baryang ginto na siya.’ ‘Sinasabi ko sa inyo:  bibigyan ang meron pero aalisan ang wala, kahit na ang meron siya ay kukunin sa kanya.  Ngunit dalhin n’yo rito ang aking mga kaaway na ayaw akong maghari sa kanila at patayin sa harap ko.’” Pagkasabi nito, umuna si Hesus sa kanila pa-Jerusalem.

PAGNINILAY

Ang pagtatagpo nila Hesus at Zaqueo ay malayo sa kumbensyonal na sitwasyon. Maaaring umabot sa kaalaman ni Zaqueo ang mga pangangaral ni Hesus, mga gawang kababalaghan, mga pagpapagaling sa maysakit, maging ang pagtanggap sa mga tulad niyang maniningil ng buwis na kung hindi kinamumuhia’y kinatatakutan ng mga tao. Ito ang nagbunsod sa kanya upang hangarin na makita si Hesus kahit man lamang sa malayuan, kahit sa maikling saglit lang, kahit alam niyang imposible ito sa dalawang kadahilanan: Una, na maari siyang ipagtabuyan ng mga taong sumusunod kay Hesus dahil kilala nga siyang hepe ng mga maniningil ng buwis, ka-lebel ng mga magnanakaw at traydor sa bayan. Pangalawa, dahil siya ay bansot, malamang na matabunan sya, matapak-tapakan o maitulak paatras. Ngunit hindi dito nagpatinag si Zaqueo; sa katunayan, mas hinahangaan natin ang kanyang pagkatao na nagpamalas ng tatlong disposisyon: (1) Conviction. Buo ang kanyang loob at tiyak sa kanyang sarili na nais niyang makita si Hesus, sa kabila ng maaring sabihin o gawin sa kanya ng mga tao. (2) Action. Hindi ang kanyang kakapusan ang magpaparalisa sa kanya, kaya’t agad siyang kumilos upang isa-katuparan ang kanyang hangarin, umakyat sa puno na naging daan ng kanilang di-karaniwang pagtatagpo. (3) Conversion. Dahil alam niyang natagpuan niya ang totoong kayamanan ng kanyang buhay, nagawa niyang talikuran ang mali at gawin ang tama. Si Zaqueo ay larawan ng pagsisisi at pagpapanibago ng buhay alang-alang sa biyaya at pag-ibig ng Diyos na kanyang natagpuan.