EBANGHELYO: LUCAS 8:16-18
Sinabi ni Jesus sa madla: “Walang nagsisindi ng ilawan at tinatakpan ito ng palayok o inilalagay sa ilalim ng higaan. Ipinapatong ito sa patungan para makita ng mga pumapasok ang liwanag. Walang nalilihim na di mabubunyag ni natatakpan na di mahahayag at malalantad. Kayat isip-isipin ninyo ang inyong naririnig dahil bibigyan pa nga ang mayroon at ang walang-wala naman, kahit na ang akala niyang kanya, ay aagawin sa kanya.”
PAGNINILAY:
Napapanahon ang panawagan sa atin ng Ebanghelyo. Sa mundong tila pinangingibabawan ng kadiliman dahil sa umiiral na sistema ng katiwalian, karahasan, kasakiman, kasinungalingan, pagkamakasarili, at pamumuhay ng immoral – matindi ang pangangailangan ng mga Kristiyanong magsisilbing ilaw sa gitna ng kadilimang ating nararanasan. Mga Kristiyanong may matibay na pananampalataya at banal na pagkatakot sa Diyos. Handang manindigan laban sa kasamaan at kadiliman sa ating lipunan. At lahat tayo, bilang mga binyagang Katolikong Kristiyano, inaanyayahan ng Panginoon na maging ilaw sa mga kapatid nating nadidimlan ng landas. Pero para magawa natin ito, kinakailangang mamuhay tayo sa liwanag na nagmumula sa Panginoon. Hindi tayo kailanman magiging ilaw sa ating kapwa, kung tayo din naman namumuhay sa dilim. Kaya para maging ilaw tayo sa sanlibutan, kinakailangang nakaugnay tayo sa pinagmumulan ng liwanag– ang Panginoong Jesus mismo, na Siyang Ilaw ng sanlibutan. Sa pagtanggap natin ng Sakramento ng Binyag at kumpil, kinasihan tayo ng Kanyang Banal na Espiritu upang laging piliin ang tama at mabuti. Sa pamamagitan ng Kanyang buhay na Salita nagagabayan tayo sa tamang pagdedesisyon na ayon sa Kanyang kalooban; at sa pamamagitan ng palagiang pakikipag-ugnay natin sa Kanya sa panalangin – napalalakas ang ating panlabang espiritwal upang huwag padadala sa agos ng kasamaan na umiiral sa lipunan. Mga kapanalig, nasa sa atin na ang espiritwal na biyaya para maging ilaw ng sanlibutan. Ano ang ating tugon/ sa panawagang ito ng Panginoon? – Sr. Lines Salazar, fsp