Ebanghelyo: Lucas 4:16-30
Pagdating ni Jesus sa Nazaret, kung saan siya lumaki, pumasok siya sa sinagoga sa Araw ng Pahinga ayon sa kanyang kinaugalian. Tumindig siya para bumasa ng Kasulatan, at iniabot sa kanya ang aklat ni Propeta Isaias. Sa paglaladlad niya sa rolyo, natagpuan niya ang lugar kung saan nasusulat: “Sumasaakin ang Espiritu ng Panginoon kayat pinahiran niya ako upang ihatid ang Mabuting Balita sa mga dukha. Sinugo niya ako upang ipahayag ang paglaya sa mga bilanggo, sa mga bulag ang pagkabawi ng paningin, upang bigyang-ginhawa ang mga api, at ipahayag ang taon ng kabutihang-loob ng Panginoon.” Binilot ni Jesus ang aklat, ibinigay ito sa tagapaglingkod at naupo. At nakatuon sa kanya ang mga mata ng lahat ng nasa sinagoga. Sinimulan niyang magsalita sa kanila: “Isinakatuparan ang Kasulatang ito ngayon habang nakikinig kayo.” At sumang-ayon silang lahat sa kanya habang nagtataka sa gayong pagpapahayag ng kabutihang-loob ng Diyos na nanggaling sa kanyang bibig. At sinabi nila: “Hindi ba’t ito ang anak ni Jose?” Sinabi ni Jesus sa kanila: “Tiyak na babanggitin ninyo sa akin ang kasabihang: ‘Manggagamot, pagalingin mo ang iyong sarili! Gawin mo rin dito sa iyong bayan ang mga bagay na narinig naming ginawa mo sa Capernaum’.” “Talagang sinasabi ko: walang propetang katanggap-tanggap sa sarili niyang bayan. Tinitiyak ko sa inyo na maraming maraming balo noon sa kapanahunan ni Elias nang sarhan ang Langit sa loob ng tatlo’t kalahating taon at nagkaroon ng matinding taggutom sa buong lupain. Gayon pa ma’y hindi ipinadala si Elias sa isa man sa kanila kundi sa babaeng balo ng Serepta sa may Sidon. Marami ring mayketong sa Israel sa kapanahunan ni propeta Eliseo pero wala sa kanilang pinagaling kundi ang Siriong si Naaman.” Napuno ng galit ang lahat sa sinagoga pagkarinig dito, tumindig sila at ipinagtulakan siya sa labas ng bayan. Dinala nila siya sa gilid ng burol na kinatatayuan ng kanilang bayan upang ihulog. Ngunit dumaan siya sa gitna nila at umalis.
Pagninilay:
Nakakapagtaka ang naging reaksyon ng mga kababayan ni Hesus sa Mabuting Balita ngayon. Sa v. 22 “pinuri siya ng lahat at humanga sila sa kanyang napakahusay na pananalita.” Hindi makapaniwala ang mga taga-Nazaret sa husay niyang magsalita kaya’t humanga sila’t pinuri siya. Pero ilang talata lamang, sa v. 28, nagalit ang lahat at itinaboy siyang palabas sa sinagoga para ihulog sa bangin.
Ano’ng nangyari? Sa isang iglap, gusto na nilang patayin yung hinahangaan nila? Bakit? Kasi, sinabi ni Hesus na tulad nila propeta Elias at Eliseo ang kaligtasang hatid niya ay para sa lahat ng mga bansa; hindi lang ito para sa Israel. ‘Yon ang ikinagalit nila. Gusto nila, sila lang ang maligtas, dahil sila ang piniling bayan ng Diyos. Hindi nila matanggap na ang Mabuting Balita ay para sa lahat.
Kapatid, ano ang nagiging balakid para tanggapin mo si Hesus sa iyong kapwa nang buong puso’t kalooban?
- Sr. Rose Agtarap, fsp l Daughters of St. Paul