EBANGHELYO: LUCAS 7:36-50
Inanyayahan si Jesus ng isa sa mga Pariseo na makisalo sa kanya pumasok siya sa bahay ng Pariseo at humilig sa sopa para kumain. Ngayon, may isang babae sa bayang iyon na itinuturing na makasalanan. Nang malaman nitong si Jesus ay nasa hapag sa bahay ng Pariseo, nagdala ito ng pabangong nasa sisidlang alabastro. Tumayo siya sa likuran, sa may paanan ni Jesus at umiyak. Tumulo ang kanyang mga luha sa mga paa ni Jesus at pinunasan niya ng kanyang buhok, at hinagkan at pinahiran ng pabango. Nang makita ito ng Pariseong kumumbida sa kanya, naisip nito: “Kung Propeta ang taong ito, malalaman niya kung sino ang babaeng ito at anong uri ng tao ang humihipo sa kanya—isa ngang makasalanan!” Ngunit nagsalita sa kanya si Jesus: “Simon, may sasabihin ako sa iyo.” Sumagot ito: “Guro, magsalita ka.” At sinabi niya: “May dalawang may utang sa isang taong nagpapautang. Limandaang salaping pilak ang utang ng isa at limampu naman ang sa isa pa. Ngunit wala silang maibayad, kaya kapwa niya sila pinatawad. Ngayon, sino sa kanila ang magmamahal sa kanya nang higit?” Sumagot si Simon: “Sa palagay ko’y ang pinatawad niya ng mas malaki.” At sinabi sa kanya ni Jesus: “Tama ang hatol mo.” At paglingon niya sa babae, sinabi niya kay Simon: “Nakikita mo ba ang babaeng ito? Pumasok ako sa iyong bahay at hindi mo ako binigyan ng tubig para sa aking paa ngunit binasa niya ng kanyang luha ang aking mga paa at pinunasan ito ng kanyang buhok. Hindi mo ako hinagkan ngunit mula nang pumasok siya’y wala nang tigil ang kahahalik niya sa aking mga paa. Hindi mo pinahiran ng langis ang aking ulo, ngunit binuhusan niya ng pabango ang aking mga paa. Kaya sinasabi ko sa iyo, pinatatawad na ang marami niyang kasalanan dahil nagmahal siya nang malaki. Ngunit nagmamahal lamang ng kaunti ang pinatatawad ng kaunti.” At nagsimulang mag-isip ang mga nasa hapag: “At nangangahas ang taong ito na magpatawad ng mga kasalanan!” Ngunit sinabi ni Jesus sa babae: “Iniligtas ka ng iyong pananampalataya; humayo ka sa kapayapaan.”
PAGNINILAY:
Mga kapanalig, tinatawagan tayo ng Ebanghelyo ngayon, na palalimin at palaguin ang ating relasyon sa Diyos. Huwag tayong panghinaan ng loob sa dami ng pagkakataong nagkasala tayo sa Kanya at sa ating kapwa. Sa halip, pagtuunang pansin kung paano tayo magbabago at gawing mas makabuluhan ang ating pakikipag-ugnayan sa Kanya. Lumapit tayo sa Sakramento ng kumpisal at pagsisihan ang ating mga kasalanan. Sabi nga ni San Juan Vianney, “Napakabuti ng Diyos! Sa mga panahong hindi natin kayang lumapit sa kanya, Siya ang lumalapit sa atin!” Inaanyayahan din tayo ng Ebanghelyo na alisin ang ugaling mapagmataas. Yun bang mas nakikita natin ang sarili na mas banal kesa sa iba? Sa halip, ituring ang bawat makasalanan na kamanlalakbay sa pananampalataya. Na katulad natin, nagsusumikap ding magpakabuti at mamuhay nang kalugod-lugod sa Diyos. -Cl. Ramon Solomon Rivera